Turqia fton Greqinë të nisin bisedimet për çështjen e detit

Turqia ka ftuar, të hënën, Greqinë për të nisur bisedimet paraprake për të zgjidhur konfliktet mes tyre, përfshi dhe atë për detin. "Ne i bëjmë thirrje Greqisë për takimin e parë për bisedime paraprake në janar," deklaroi Ministri i Jashtëm turk Mevlüt Çavuşoğlut, gjatë një fjalimi publik në Ankara me ministrin e Jashtëm të Qipros së veriut. Thirrja e Çavuşoğlut për të filluar bisedimet me Greqinë u përsërit dhe nga zëdhënësi presidencial turk, Ibrahim Kalin. Ministri turk komentoi dhe ftesën e kryeministrit Rama për të mundësuar takimin me ministrin grek Dendias në Tiranë:

“Pas takimit të parë, jam i gatshëm të takoj Dendias në Tiranë me ftesën e Ramës. Kjo është një ftesë, shpresoj që Greqia nuk e refuzon këtë mundësi, këtë ftesë dhe së shpejti fillojnë bisedimet hulumtuese.”

Menjeherë pas këtyrë deklaratave ka reagur zëdhënësi i Ministrisë së Jashtme të Greqisë, Alexandros Papaioannou. Ai tha se Greqia nuk ka marrë asnjë ftesë zyrtare nga Turqia:

“Ministria e Jashtme Greke nuk ka marrë asnjë ftesë nga Ministria e Jashtme Turke në lidhje me të. Greqia, siç dihet, ka shprehur gatishmërinë e saj për t’iu përgjigjur, në rast të një ftese përkatëse nga pala turke, në bazë të Ligjit Ndërkombëtar mbi caktimin e zonës së EEZ dhe shelfit kontinental.”

Ndërkohë vlen të kujtohet se javën e kaluar, kryeministri Rama vizitoi njëra pas tjetrës Turqinë dhe Greqinë. Greqia dhe Turqia prej disa muajsh kanë shkëmbyer akuza dhe kërcënime për sa i përket konfliktit për ndërhyrjet e Turqisë në ujrat grekë. Po ashtu, Turqia ka paralajmëruar se një zgjerim i detit nga ana e Greqisë në lindje do të ishte një shkak për luftë.   Shpërndaje te miqtë