Rindërtimi, banorët e Kombinatit kundërshtojnë zhvendosjen në Vaqarr

Dhjetra banorë të Kombinatit, shtëpitë e të cilëve janë dëmtuar nga tërmeti, kanë kundërshtuar zhvendosjen në Vaqarr. Gjatë një takimi me kryetaren e LSI-së Monika Kryemadhi, banorët janë shprehur të revoltuar se kanë mësuar së duhet të zhvendosen në Vaqarr, por bashkia nuk i jep asnjë sqarim. Ata thanë se do të rezistojnë dhe nuk do të pranojnë të lëshojnë pronën e tyre:

“Nëse është në plan për t’u prishur të gjithë, të ndërtohet këtu në këtë tokë. Kaq kërkojmë. Minimalisht këto tulla i kemi blerë me gjak. Të gjithë banorët këtu nuk e lejojnë një gjë të tillë, këtu kanë për të hasur rezistencë.”

Kryemadhi i bëri thirrje banorëve të Kombinatit që të qëndrojnë të bashkuar dhe të mos lejojnë kryebashkiakun Veliaj tu marrë pronat:

“Unë dua të them se garancia ime personale është të shikojmë nga ana ligjore, se pronën tuaj që e keni që në vitet’ 50 nuk e tjetërson dot Erjon Veliaj.”

Ajo i kërkoi banorëve që të shohin të gjithë dokumentet e pronave dhe të shohin mundësinë për të ngritur padi në gjykatë ndaj bashkisë Tiranë. Shpërndaje te miqtë