Koalicioni i udhëhequr nga partia e Zoran Zaevit është fituesja e zgjedhjeve në Maqedoninë e Veriut me 46 mandate nga 120 në total.
Komisioni Shtetëror i Zgjedhjeve në Maqedoninë e Veriut ka publikuar ndarjen e mandateve të partive në bazë të votave të numëruara deri tani. Renditja është si më poshtë:
- Koalicioni “Mundemi” i udhëhequr nga LSDM – 46 deputetë;
- Koalicioni i udhëhequr nga VMRO-DPMNE - 44 deputetë;
- Bashkimi Demokratik për Integrim – 15 deputetë;
- Aleanca për Shqiptarët dhe Alternativa – 12 deputetë;
- Partia e krahut të majtë “Levica” – 2 deputetë;
- Partia Demokratike Shqiptare – 1 deputet.
Pak orë më parë, kreu i BDI-së Ali Ahmeti deklaroi se partia e tij ka fituar 12 mandate, por duket se ndarja sipas zonave zgjedhore ka bërë që zyrtarisht BDI të fitojë dhe 3 mandate të tjera.
Kuvendi i Maqedonisë së Veriut ka 120 deputetë, të cilët zgjidhen në 6 zona zgjedhore me nga 20 deputetë.
Rezultati përfundimtar i zgjedhjeve të 15 korrikut pritet të dalë mbrëmjen e së enjtes.
Nëse ruhen të njëjtat ritme si deri tani, koalicioni i LSDM-së do të ketë nevojë për aleatë për të formuar koalicionin qeverisës.
Shpërndaje te miqtë
