Peza: PS nuk ka premtuar ndryshim sistemi, PD po

Alfred Peza, Sekretari i Marrëdhënieve me Mediat në PS, ka deklaruar se PS asnjëherë nuk ka premtuar dhe nuk ka kërkuar ndryshim të sistemit zgjedhor. I ftuar në emisionin Real Story, të hënën 8 qershor, Peza u shpreh se ka qenë kreu i PD-së Basha ai që ka premtuar ndryshimin e sistemit, ndaj përgjegjësia është e tij:

“Të paktën në tre vitet e fundit, ka qenë Lulzim Basha, ai që e ka pas një premtim publik ndryshimin e sistemit në Shqipëri.

Në gjithë këtë diskurs publik të liderit të opozitës, kuptohet që barra e përgjegjësisë i bie atij që e ka marrë përsipër.

Është e vërtetë që nuk është mbyllur 100 për qind çështja e sistemit, por PS ka qenë e qartë, nuk e ka kërkuar, nuk e ka premtuar dhe nuk ia ka firmosur dikujt publikisht.”

Sipas Pezës, për PS-në është e qartë që zgjedhjet nuk fitohen nga sistemi. Të njëjtin qëndrim ka mbjatur publikisht dhe kryeministri Rama.