Partia Demokratike e quajti emërimin e Armela Imerajt në krye të Autoritetit të Medias Audiovizive “një kërcënim serioz për lirinë dhe pavarësinë e medias”.
Deputetja e PD-së, Albana Vokshi, i kërkoi SPAK të nisë hetimet për padinë e kryer nga PD kundrejt Imerajt për “shpërdorim detyre”, gjatë fushatë zgjedhore.
SPAK-u “të nxjerrë dosjen nga sirtari, ku qëndron prej gati 4 muajsh, dhe ta hetojë militanten e Edi Ramës! Ky do të jetë një kontribut real jo vetëm për zgjedhjet, por edhe për lirinë e medias”, u shpreh Vokshi në një deklaratë për median, të enjten.
Ajo theksoi se votimi i Imerajt duke injoruar thirrjet e partnerëve ndërkombëtarë për shtyrje të votimit, tregoi se prioriteti kryesor I Ramës “nuk është integrimi europian, por pushteti personal”.
“Qeveria e di mirë se pa përmbushjen e standardeve demokratike, nisja e bisedimeve për anëtarësim mbetet thjesht një akt formal”, përfundoi Vokshi.
Armela Imeraj u zgjodh të mërkurën drejtuese e AMA-s.
