Udhëheqësi i Koresë së Veriut, Kim Jong-un, ka pranuar zyrtarisht se vendi i tij po përballet me mungesë ushqimi.
Gjatë një takimi me drejtuesit e lartë të vendit, Kim tha se "situata e ushqimit për popullin tani po tensionohet", raporton BBC.
Ai tha se sektori i bujqësisë kishte dështuar të përmbushte objektivat e tij të grurit për shkak të përmbytjeve të shkaktuara nga tajfunet vitin e kaluar.
Sipas medias britanike, çmimet e ushqimeve në Korenë e Veriut janë rritur ndjeshëm duke bërë që një kilogram banane të kushtojë 45 dollarë.
Koreja e Veriut ka mbyllur kufijtë e saj për të frenuar përhapjen e Covid-19.
Si rezultat, tregtia me Kinën ka rënë. Koreja e Veriut mbështetet tek Kina për ushqim, pleh organik dhe karburant.
Koreja e Veriut vuan gjithashtu sanksionet ndërkombëtare, të vendosura për shkak të programeve të saj bërthamore.
Kim tha gjithashtu gjatë takimit se prodhimi kombëtar industrial ishte rritur me 25% në krahasim me të njëjtën periudhë të vitit të kaluar.
Koreja e Veriut vuajti nga uria gjatë viteve 1990 pas rënies së Bashkimit Sovjetik. Në atë kohë vlerësohet se rreth 3 milionë njerëz humbën jetën si pasojë e mos pasjes së ushqimit.
