Hungaria do të lehtësojë shumicën e masave kufizuese gjatë fundjavës. Lajmin e bëri të ditur kryeministri hungarez, Viktor Orban.
Ai njoftoi se qytetarët nuk do të kenë nevojë të mbajnë maska në ambjentet e jashtme.
“Kjo do të thotë që ne kemi mundur valën e tretë të pandemisë. Ka ardhur koha për t'i thënë "lamtumirë maskave" në vendet publike.”, u shpreh ai.
Hungaria është i vetmi vend i Bashkimit Evropian që ka miratuar dhe përdorur vaksinën ruse Sputnik V dhe atë kineze.
Kjo i ka mundësuar këtij vendi që të arrijë një nga nivelet më të larta të vaksinimit në BE. Rreth 50% e popullsisë prej rreth 10 milionësh, tashmë kanë marrë të paktën njërën dozë të vaksinës.
