Gjykata Kushtetuese vendos tre çështjet e para që do të shqyrtojë

Zgjedhjet e 30 qershorit dhe shembja e Teatrit nuk do të jenë çështjet e para që do të shqyrtojë Gjykata Kushtetuese. Pas mbledhjes së ditës së enjte, 7 anëtarët e Kushtetueses kanë përcaktuar kalendarin e çështjeve që do të shqyrtojnë gjatë muajit janar dhe shkurt. Çështja e parë që do të shqyrtohet më 26 janar, është kërkesa e Gjykatës së Tiranës me objekt:

“Shfuqizimi si i papajtueshëm me Kushtetutën e Republikës së Shqipërisë i togfjalëshit “nga gjykata e shkallës së parë që ka dhënë vendimin në dhomën e këshillimit”, parashikuar në pikën 1 të nenit 453 të Kodit të Procedurës Penale, si dhe togfjalëshit “... i së njëjtës gjykatë”, parashikuar në pikën 3 të nenit 453 të Kodit të Procedurës Penale, të ndryshuar me ligjin nr. 35/2017.”

Pas kësaj, Gjykata do të mblidhet në muajin shkurt për të shqyrtuar dy çështje të tjera. Më 4 shkurt, anëtarët e Kushtetueses do të shqyrtojnë kërkesën e Shoqatës Kombëtare “Pronësi me Drejtësi” e cila kërkon shfuqizimin e tre ligjeve dhe dy VKM-ve që kanë lidhje me trajtimin dhe kompensimin e pronave. Çështja e tretë që do të shqyrtojë Gjykata Kushtetuese është kërkesa e një shtetasi për konstatimin e cenimit të së drejtës kushtetuese për një proces të rregullt ligjor. Gjykata Kushtetuese ka kuorumin e duhur për të shqyrtuar çështje dhe marrë vendime. Ajo u bë funksionale në fund të dhjetorit të 2020. Gykata Kushtetuese përbëhet nga 7 anëtarë. Tre prej tyre janë zgjedhur nga Presidenti (Marsida Xhaferllari, Përparim Kalo dhe Sonila Bejtja) dhe Kuvendi (Fiona Papajorgji, Elsa Toska dhe Altin Binaj). Ndërkohë kryetarja në detyrë është Vitore Tusha, të cilës i ka mbaruar mandati. Disa nga çështjet që priten të shqyrtohen nga Gjykata janë ligji për Teatrin Kombëtar,  zgjedhjet e 30 qershorit, ndryshimet e Kodit  Zgjedhor si dhe mosdekretimi i Sandër Lleshajt dhe Gent Cakajt në postet e ministrave. Shpërndaje te miqtë