Cilësia e jetesës, Tirana ndër dy qytetet me jetesën më të keqe në Evropë

Tirana është një nga dy qytetet me cilësinë më të keqe të jetesës në Evropë. Këtë përfundim e nxjerr Mercer, kompania ndërkombëtare e konsulencës që çdo vit vëzhgon dhe rendit më shumë se 200 qytete në botë për cilësinë e jetës. Ndër 231 qytete në botë, Tirana renditet në vend të 176. Ndërsa nga qytetet e Evropës, Tirana lë pas vetëm kryeqytetin e Bjellorusisë, Minsk, që renditet në vend të 188-të. Në Ballkan të gjithë qytetet e marra nën vëzhgim, Zagrebi, Beogradi, Sarajeva, Shkupi, renditet më mirë se sa Tirana, me Zagrebin si qytetin me cilësi më të mirë, në vend të 98-të. Më lart se Tirana renditen dhe qytete të vendeve të botës së tretë si kryeqytetet e Ugandës, Senagalit, Ganës, Gabonit. Mercer merr në shqyrtim 39 faktorë në 10 kategori të ndryshme të jetesës në qytete:

1.Mjedisi ekonomik (shërbimet bankare, financiare, fuqia e monedhës, etj.)

2.Mjedisi politik dhe social (qëndrueshmëria, kriminaliteti, zbatimi i ligjit, etj.)

3.Mjedisi socio-kulturor (censura e medias, liria e shprehjes, etj.)

4.Shërbimet publike dhe transporti (furnizimi me energji elektrike dhe ujë, transporti publik, trafiku, telefonia, prania e aeroporteve, etj.)

5.Shërbimi shëndetësor (shërbimi spitalor, gjendja e spitaleve, ndotja e ajrit dhe ujit, sëmundjet infektive, menaxhimi i mbetjeve, etj.)

6.Shkollat dhe arsimi (standardet e shkollave, disponueshmëria e shkollave ndërkombëtare, etj.)

7.Mjedisi natyror (klima, katastrofat natyrore, etj.)

8.Strehimi (strehimi, mobilimi dhe mirëmbajtja e shtëpive, ambientet me qira, etj.)

9.Argëtimi (kinematë, teatrot, aktivitetet sportive, restorantet, etj.)

10.Mallrat e konsumit (cilësia e ushqimit, disponueshmëria e mallrave të konsumit, makinat, etj.)

Sipas Mercer, në vend të parë për cilësinë më të lartë të jetesës renditet Viena, kryeqyteti i Austrisë. Pas saj renditen Zyrihu (Zvicër), Okland (Zelandë e Re), Mynihu (Gjermani) dhe Vankuveri (Kanada). Në vend të fundit si qytetet më cilësinë më të keqe të jetesës renditen Bagdadi (Irak), Bangui (Republika e Afrikës Qendrore) dhe Sana’a (Republika Arabe e Jemenit). Shpërndaje te miqtë