Autoritetet bjelloruse kanë bllokuar faqen e internetit të një gazete që ka qenë kritike ndaj udhëheqësit Alexandër Lukashenko dhe kanë marrë në pyetje kryeredaktorin e saj.
Gazeta, Nasha Niva, një nga më të vjetrat e Bjellorusisë, raportoi mbi protestat kundër Lukashenkos verën e kaluar dhe ishte një burim i rëndësishëm informacioni për mbështetësit e opozitës.
Përfaqësuesit e saj thanë se forcat e sigurisë kishin bastisur zyrat dhe kishin arrestuar kryeredaktorin e saj, Yahor Martsinovich.
Gruaja e Martsinovich njoftoi mediat sociale se burri i saj ishte ndaluar ndërsa kishte nxjerrë shëtitje qenin dhe se më pas shtëpia e tyre ishte kontrolluar.
Ministria Bjelloruse e Informacionit tha në një deklaratë se kishte bllokuar faqen e internetit me kërkesë të Prokurorit të Përgjithshëm, duke e akuzuar atë për përhapjen e informacionit “në emër të organizatave që nuk janë të regjistruara në Bjellorusi”.
Komiteti hetimor i vendit më vonë tha se Martsinovich ishte arrestuar nën dyshimin se ai kishte marrë pjesë në protesta masive anti-qeveritare vitin e kaluar dhe kishte "shkelur rendin publik".
Mediat kritike ndaj qeverisë në Bjellorusi kanë qenë në shënjestër të autoriteteve pas protestave masive që përfshinë vendin gushtin e kaluar pas zgjedhjeve presidenciale që opozita tha se ishin manipuluar.
Në kulmin e demonstratave, Nasha Niva publikoi video që tregonin se policia arrestoi dhunshëm protestuesit.
Policia financiare bjelloruse në maj bastisi redaksinë e Tut.By, faqja më e madhe jo-shtetërore e lajmeve në vend, dhe shtëpitë e disa anëtarëve të saj pasi ia hoqi statusin si media zyrtare.
Po atë muaj autoritetet arrestuan gazetarin disident Roman Protasevich dhe të dashurën e tij pasi detyruan avionin ku ata po udhëtonin nga Athina në Vilnus të bënte ulje të detyruar në Minsk.
