Basha, qeveria po vepron me vonesë, të mbyllë sa më shpejt fasoneritë

Kryetari i Partisë Demokratike Lulzim Basha akuzoi të premten qeverinë se po vonon për të parandaluar përhapjen e koronavirusit. Në një deklaratë për mediat, Basha mori për shembull rastin e infektimit me Covid-19 të disa punonjëseve fasonerie në Krujë. Kryetari i PD-së theksoi se opozita ka kërkuar prej 5 javësh mbylljen e këtij sektori për rrezikun potencial që ka për përhapjen e infeksionit.

“Rasti i përhapjes nga fasoneria e Krujës në dy zona të ndryshme në Kurbin është një këmbanë alarmi.

Opozita e ka patur informacionin e infektimit në fasonerinë e Krujës që dy ditë më parë dhe kemi informuar autoritetet […] Është për të ardhur keq që qeveria vepron me shumë vonesë.

Ajo është e prirur të mohojë dhe pastaj të veprojë.”

Basha këmbënguli se pas këtij rasti nuk ka më kohë për refuzime, por qeveria duhet të urdhërojë mbylljen e fasonerive në të gjithë vendin dhe bashkë me to të gjitha mjediset e punës me grumbullime të mëdha punonjësish. Kryetari i opozitës i bëri thirrje qeverisë që t'u mundësojë pa vonesa edhe testimin punonjësve të fasonerive ku janë diagnostikuar raste me Covid-19. Të premten autoritetet shëndetësore raportuan 21 persona të tjerë të infektuar me Covid-19 duke e çuar totalin në 539 të infektuar, prej të cilëve 283 janë shëruar dhe 26 kanë vdekur.