Basha: Luftëtarët e UÇK-së do t'i faktojnë drejtësinë se akuzat janë të pabaza

Kryetari i PD-së Lulzim Basha shprehu mbështetjen e tij për ish-komandatët e UÇK-së që u nisën për në Hagë, sot, 5 nentor. Në një deklaratë për shtyp, të enjten, Basha tha se ata do t’i provojnë botës se aktakuzat ndaj tyre janë të pabaza:

“Jam i bindur se edhe ata, që nga presidenti Hashim Thaçi, kryetari i PDK Kadri Veseli, ish kryetari i Kuvendit Jakup Krasniqi e luftëtarë të tjerë të UÇK-së, do t’i faktojnë drejtësisë dhe mbarë botës se aktakuzat ndaj tyre janë të pabaza”.

Ai e quajti të padrejtë barazimin e viktimës me agresorin:

“Askush nuk mund të barazojë luftën e drejtë të UÇK-së për dinjitet njerëzor dhe liri, me masakrat dhe genocidin e ushtruar nga hordhitë kriminale të Millosheviçit ndaj popullsisë civile të Kosovës”.

Basha tha se asnjë shqiptar i Kosovës nuk i është fshehur përballjes me drejtësinë e gjithmonë kanë dalë fitimtarë. Shpërndaje te miqtë