Ambasadori i ri i Austrisë në Tiranë, Christian Steiner i ka bërë thirrje politikanëve shqiptarë që të punojnë për plotësimin e 15 kushteve të vëna nga Bashkimi Europian para Konferencës së Parë Ndërqeveritare, në fillim të vitit 2021 – e cila përcakton fillimin në praktikë të negociatave Shqipëri-BE.
Në një intervistë për gazetën Panorama, Zoti Steiner deklaroi se pas çeljes së negociatave nga BE-ja në mars 2020, tani është në dorën e Shqipërisë të përmbushë kushtet.
Ai vuri theksin tek përfundimi i Reformës Zgjedhore, vazhdimi i reformës në drejtësi dhe liria e medias:
"Pasi Këshilli i BE-së më 25 mars çeli dritën jeshile, tani është në dorën e Shqipërisë të përmbushë kriteret e anëtarësimit.
Bëhet fjalë për 15 temat e lidhura me kriteret politike, nga të cilat, përveç Reformës Zgjedhore, për mendimin tim, liria e medias dhe Reforma në Drejtësi janë të një rëndësie të veçantë.
Ne shpresojmë shumë që këto kushte do të përmbushen sa më parë të jetë e mundur, në mënyrë që të mund të mbahet Konferenca e parë e Anëtarësimit."
Ambasadori theksoi se Austria mbështet Shqipërinë në rrugën e saj drejt integrimit europian.
Shpërndaje te miqtë
