84-vjeçarja lë spitalin, ndër më të moshuarat e shëruar nga Covid-19 në Shqiperi

Një 84-vjeçare, e cila kishte qenë sëmurë me Covid-19, doli nga Spitali Infektiv të martën duke u bërë ndër më të moshuarat e shëruar nga koronavirusi në Shqipëri. Lajmi u njoftua përmes një postimi në Facebook nga Ministrja e Shëndetësisë Ogerta Manastirliu.

"Nënë Rukija, plot 84 vjeç, ka lënë Spitalin Infektiv e shëruar nga Covid-19 [...] deri tani 154 qytetarë dhe staf mjekësor kanë mundur koronavirusin"

Të mërkurën, autoritetet shëndetësore raportuan 17 raste të reja me Covid-19 duke e çuar totalin në 400 persona të infektuar. Prej tyre 22 kanë vdekur (asnjë në 24 orët e fundit) dhe 154 janë shëruar (23 në 24 orët e fundit). Sipas statistikave mbi 15 për qind e personave të infektuar në Shqipëri janë mbi 70 vjeç, por vetëm 10 për qind e tyre janë shëruar.