Një tornado që kaloi të enjten në mbrëmje nëpër disa fshatra të Republikës Çeke, la pesë persona të vrarë dhe plagosi rreth 150 të tjerë.
Stuhia shkuli çatitë e ndërtesave dhe pemët si dhe përmbysi makinat në zonat jug-lindore të Breclav dhe Hodonin.
Shkatërrimi i erërave të forta me shpejtësi 219 km/h i shndërroi zonat e prekura në zona lufte.
Qeveria raportoi rreth 1000 shtëpi të shkatërruara, ndërkohë që mungon energjia elektrike apo kushtet higjeno-sanitare. Autoritetet lokale po punojnë për të siguruar strehim për njerëzit e mbetur jashtë.
Në ndihmë të ekipeve vendase të shpëtimit kanë zbarkuar ato nga Austria dhe Sllovakia fqinje dhe vendi ka shpallur gjendjen e jashtëzakonshme.
Kryeministri Andrej Babis, i cili është në Bruksel për një samit të BE, e përshkroi atë që kishte ndodhur si një apokalips, sipas një raportimi të BBC.
Ai kërkoi aktivizimin e fondit të emergjencave të Bashkimit Evropian për të përballuar situatën.
