Parlamenti Europian do të kërkojë njohjen e Kosovës nga 5 shtetet anëtare të BE të cilat nuk e kanë njohur ende.
Ftesa që përsëritet në draft-raportin për Kosovën, të përgatitur në Komisionin e Politikës së Jashtme nga raportuesja për Kosovën, Viola Von Cramon, i drejtohet konkretisht Qipros, Greqisë, Rumanisë, Sllovakisë dhe Spanjës.
“Jemi në dijeni se pesë shtetet anëtare ende nuk e kanë njohur Kosovën dhe përsëritet thirrja ndaj atyre që ta bëjnë këtë; nënvizohet se njohja do të ishte në dobi të normalizimit të raporteve mes Kosovës dhe Serbisë”, thuhet në këtë dokument.
Përpos njohjes, në draft-raport kërkohet nga Këshilli që të heqë regjimin e vizave për Kosovën pasi i ka përmbushur të gjitha kushtet për liberalizimin e vizave që në vitin 2018.
Nga Kosova kërkohet që të shtojë përpjekjet për të adresuar problemet në fushën e sundimit të ligjit, të drejtat themelore, funksionimin e institucioneve dhe zhvillimin ekonomik.
Parlamenti Europian është i vetmi insitucion i BE që i referohet Kosovës si shtet. Ai thekson se njohja e saj do të kontribuojë në stabilitetin politik të vendit që ka mbetur i trazuar edhe pas zgjedhjeve të tetorit.
Draft-raporti do të debatohet tashmë në Komisionin e Jashtëm të Parlamentit Evropian para se të votohet si raport. Pastaj ai do t’i kalojë seancës plenare të PE, ku pasi të debatohet do të votohet si rezolutë.
Shpërndaje te miqtë
