Presidenti Ilir Meta shprehu, të mërkurën, ngushëllimet për ndarjen nga jeta të kantautorit Kujtim Prodani.
“Një humbje e madhe për artin shqiptar”, ka shkruar presidenti në Facebook.
Meta është shprehur në postimin e tij se sot “u shua kantautori ynë i shquar, artisti virtuoz dhe qytetari model, Kujtim Prodani, djali i dy prindërve të mrekullueshëm dhe artistëve të paharruar Anita Take dhe Agim Prodani”.
Ai ka shprehur ngushëllimet komunitetit të këngëtarëve dhe të gjithë artdashësve.
“Këngët dhe muzika e Kujtim Prodanit do dëgjohen përherë”, tha Meta.
Kantautori Kujtim Prodani ka ndërruar jetë, të mërkurën, i infektuar me Covid-19.
Ai ishte infektuar me koronavirus prej disa ditësh dhe në 30 dhjetor u lajmërua shtrimi i tij në spital.
Nuk dihet ende nëse Prodani vuante nga sëmundje të tjera shoqëruese.
Kujtim Prodani, 57 vjeç, do të mbahet mend si kantautor i dhjetra këngëve të muzikës së lehtë.
Këngët e tij më të njohura ishin ‘I am from Tirana’, ‘Shpirt i Trazuar’, ‘Mikesha’ etj.
Prodani do të mbahet mend për tekstet me kuptim të këngëve të tij.
Shpërndaje te miqtë
