Anëtari i Kryesisë së Lidhjes Demokratike të Kosovës, Arban Abrashi, ka propozuar datën 7 shkurt për zgjedhjet e parakohshme që do të mbahen në Kosovë.
Abrashi tha se gjatë takimit me presidenten në detyrë Vjosa Osmani, i bëri asaj këtë propozim.
“Gjithsesi ky është takim preliminar dhe besoj që në takimet, pas aktgjykimit të plotë të Gjykatës Kushtetuese, e caktojmë edhe më saktë datën”, tha Abrashi pas takimit me Osmanin.
LDK-ja nuk ka ende kandidat për kryeministër, tha ai.
Osmani nisi të martën takimet me përfaqësues nga të gjitha partitë, sa i takon zgjedhjeve të parakohshme.
Kjo erdhi pas vendimit të Gjykatës Kushtetuese, e cila e shpalli votën e deputetit Etem Arifi për qeverinë Hoti të pavlefshme.
Vota e tij ishte vendimtare në formimin e qeverisë aktuale, i cili mori vetëm 61 vota në parlamentin me 120 vende, numri minimal i votave të kërkuara.
Vendimi i Kushtetueses rrëzon votimin e qeverisë Hoti pasi nuk sigurohet numri i mjaftueshëm i votave në Kuvendin e Kosovës.
Në këtë rast, vendi duhet të mbajë zgjedhje brenda 40 ditësh.
Çështja në Kushtetuese u zhvillua me kërkesë të partisë Vetëvendosja, e cila pretendon se qeveria Hoti është e paligjshme, sepse për formimin e saj ka votuar dhe deputeti Etem Arifi.
Kreu i LDK-së Isa Mustafa nuk ka shkuar në takim me presidenten.
Shpërndaje te miqtë
