India ka miratuar, të dielën, vaksinën e dytë për përdorim emergjent, atë të prodhuar nga kompania indiane Bharat Biotech, e quajtur COVAXIN.
Një ditë më parë, India miratoi vaksinën anti-Covid prodhuar nga AstraZeneca dhe Universiteti i Oksfordit.
Të dyja vaksinat do të injtektohen në dy doza, disa javë larg njëra-tjetrës.
Deri më tani, India ka raportuar më shumë se 10 milion të infektuar me Covid-19.
Vaksinimi i vendit të dytë më të populluar në botë me një nga nivelet më të larta të infeksioneve do të jetë një hap i madh në betejën kundër pandemisë.
Vaksina e AstraZeneca konsiderohet jetike për vendet me të ardhura më të ulëta dhe ato në klimë të nxehtë sepse është më e lirë, më e lehtë për tu transportuar dhe mund të ruhet për periudha të gjata në temperatura normale të frigoriferit.
Sipas të dhënave paraprake vaksina e Astra Zeneca është 62% efikase për të krijuar mbrojtje ndaj COVID-19. Ajo merret në dy doza. Megjithatë ka të dhëna se efikasiteti i vaksinës rritet në 90% nëse së pari injektohet gjysma e dozës së saj dhe në injektimin e dytë merret e plotë.
Shpërndaje te miqtë
