Ambasada e SHBA-ve në Tiranë i paralajmëroi qytetarët të mos bien pre e mashtrimit me vizat amerikane. Në një njoftim në rrjetet sociale, të enjten, ambasada theksoi se vizat amerikane nuk merren duke paguar para në persona të tretë.
“Departamenti i Shtetit nuk do t’ju kërkojë kurrë të transferoni para tek një individ apo organizatë tjetër për të marrë vizën tuaj. Informoni veten në mënyrë që të mos bëheni viktimë e një mashtrimi”, shkruhet në njoftimin e ambasadës.
Sipas njoftimit, “mashtrimet zakonisht përfshijnë faqe interneti të rreme, adresa emaili dhe kërkesa për tarifa shtesë që duhet paguar për të marrë një vizë”.
