Papa Françesku bëri thirrje të dielën për t'i dhënë fund konfliktit në Izrael dhe Gaza, duke thënë se vdekjet e kaq shumë njerëzve të pafajshëm ditët e fundit, përfshirë fëmijët, ishin të papranueshme.
"Unë bëj apel për qetësi dhe për ata që janë përgjegjës t'i japin fund zhurmës së armëve dhe të marrin rrugën e paqes," tha ai në fjalimin e përjavshëm për besimtarët e mbledhur në Sheshin e Shën Pjetrit.
"Shumë njerëz të pafajshëm kanë vdekur, mes tyre ka edhe fëmijë. Kjo është e tmerrshme. E papranueshme. Vdekja e tyre është një shenjë se (njerëzit) nuk duan të ndërtojnë një të ardhme, por e shkatërrojnë atë ... Pyes veten se ku t’i çojë urrejtja dhe hakmarrja?", shtoi Papa.
Prej një jave, Hamasi, grupi që qeveris në Gaza dhe Izraeli janë përfshirë në luftime që kanë shkaktuar vdekjen e qindra personave, mes tyre edhe civilë.
Hamasi lëshoi të hënën raketa në drejtim të Jeruzalemit dhe Tel Avivit si hakmarrje për përplasjet e policisë izraelite me palestinezët pranë Xhamisë Al-Aqsa në Jeruzalem, vendi i tretë më i shenjtë i fesë islame.
Izraeli është kundërpërgjigjur duke bombarduar militanët e Hamasit në Gaza.
Përpjekjet për të arritur një amrmëpushim deri tani kanë dështuar.
