Operacioni ndërkombëtar/ Sekuestrohen 3 milionë euro pasuri të 4 trafikantëve shqiptarë

Gjykata e Tiranës ka vendosur sekuestrimin e 3 milionë eurove pasuri në pronësi të 4 të arrestuarve shqiptarë në Danimarkë. Personat u arrestuan për trafik droge dhe armësh, në kuadër të operacionit ndërkombëtar “Goldfinger”, më 26 qershor. Pasuritë e konfiskuara janë:

 - Një kompani private me aktivitet në Shkodër me vlerë investimi mbi 1,5 milionë euro;

 - 10 apartamente banimi, në plazhin e Velipojës;

 - 1 apartament banimi në Shkodër;

 - 14 automjete të markave të ndryshme, prodhim i viteve të fundit.

Policia e Shtetit lajmëroi se po heton edhe pasuri të tjera të luajtshme, të paluajtshme, dhe llogari bankare të përfituara nga aktiviteti kriminale i personave të tjerë të lidhur me to. Policia daneze arrestoi 31 persona, ndër to edhe 4 shqiptarë për trafik droge, dhe armësh. Operacioni u bë me bashkëpunimin e policisë gjermane, hollandeze, sllovene, suedeze si dhe shqiptare.