Maqedonia e Veriut, mësimi fillon në tetor

Viti i ri shkollor në Maqedoninë e Veriut do të fillojë në 1 tetor. Lajmin e bëri të ditur kryeministri Zoran Zaev.

“Viti shkollor nuk do të fillojë më 1 shtator. Për shkak të përgatitjes së protokolleve shëndetësore, mësimi duhet të nisë më 1 tetor. Vendimi do të merret në seancën e parë të qeverisë, në të cilën do të miratohen edhe ndryshimet ligjore për mbarëvajtjen e procesit mësimor”

Komisioni për Sëmundje Infektive në Maqedoninë e Veriut i rekomandoi qeverisë që mësimi nga klasa e parë deri në të tretën të zhvillohet në shkolla, ndërsa fëmijët që nuk duan të rikthehen në shkolla, mund ta ndjekin mësimin online. Nga klasa e katërt deri në të nëntë dhe të mesëm, mësimi është parashikuar të zhvillohet online. Maqedonia e Veriut është njëri nga vendet më të prekura në Ballkanin Perëndimor nga pandemia e koronavirusit. Mbi 13,800 persona janë infektuar atje dhe mbi 570 kanë humbur jetën.   Shpërndaje te miqtë