Ambasada e SHBA në Shqipëri zbardhi takimin virtual të Ndihmës Sekretari i Shtetit të SHBA Matthew Palmer.
Ai u takua me presidentin Meta, kryeministrin Rama dhe kryetarin e PD-së Basha, “për të konfirmuar rëndësinë e marrëdhënieve SHBA-Shqipëri ndërsa festojmë 30-vjetorin e rivendosjes së marrëdhënieve diplomatike”, thuhet në njoftimin e ambasadës.
“Ata rikonfirmuan përkushtimin tonë të përbashkët për të zgjeruar bashkëpunimin dypalësh në fushën e demokracisë, mbrojtjes dhe biznesit”, njofton ambasada.
Ai theksoi rëndësinë e roleve të tyre përkatëse, përfshirë edhe rolet institucionale të Presidencës dhe Kryeministrisë.
Palmer gjithashtu përforcoi mbështetjen e Shteteve të Bashkuara të Amerikës për zbatimin e reformës në drejtësi, “duke vërejtur përparimin domethënës që është bërë gjatë vitit të fundit”.
Zv. Ndihmës Sekretari Palmer theksoi rëndësinë strategjike të stërvitjes ushtarake Defender 21.
Nisma Defender – Europe e krijuar 25 vjet më parë është një stërvitje shumëkombëshe e drejtuar nga Shtetet e Bashkuara të Amerikës (SHBA), me pjesëmarrjen e NATO-s.
Ajo është stërvitja më e madhe e ushtrisë amerikane në Evropë me rreth 20 mijë ushtarë të dërguar nga SHBA-të në Evropë. Kjo nisëm u krijua për të treguar angazhimin e SHBA-ve në NATO dhe mbështetjen për vendet aleate në Evropë e jashtë saj.
Zv/ndihmës sekretari amerikan i Shtetit, Matthew Palmer mbështeti të martën qëndrimet e ambasadores amerikane Yuri Kim.
Ai tha se ajo ka pasur të drejtë se kandidatët në zgjedhjet e 25 prillit në Shqipëri “duhet të jenë të besueshëm”.
