Sot, kryeministri Rama dhe ministri i Brendshëm Tahiri inauguruan godinën e rikonstruktuar të Ministrisë së Punëve të Brendshme dhe Murin e Memories, një memorial për të kujtuar policët e rënë gjatë detyrës.
Deklaratat kryesore të kryeministrit Rama ishin:
Për Policinë e Shtetit dhe godinën e rikonstruktuar:
- Suvaja e rrjepur e kësaj godine ishte simbolika e drejtëpërdrejtë e rrjepjes së imazhit së fytyrës së Policisë së Shtetit.
- Në këto tre vite besoj se mund të jemi krenarë për ç’ka kemi bërë, për ta rilindur Policinë e Shtetit.
- Në tre vjet kemi investuar për Policinë e Shtetit më shumë se çdo qeveri në 25 vite të marra së bashku. Rritëm deri në 25 për qind rrogat e policisë së shtetit.
- Lufta me krimin drogën dhe trafikun dhe për sigurinë e qytetarit është sot sikur nuk ka qenë kurrë më parë edhe më e mirë do të bëhet
- Patjetër do të vazhdojmë të rrisim dhe rrogat e policisë, por të mos xhelozohen nëse do i rrisim më shumë pagat e mësuesve këtë herë.
- Së shpejti do bëhet prezantimi i transformimit rrënjësor, sasior dhe cilësor i gjithë uniformave të policisë së shtetit.
Për Murin e Memories:
- Është simboli i një vullneti të hekurt për të mos i harruar më dëshmorët e policisë së shtetit dhe për të formuar rreth tyre një mit, mitin e uniformave blu.
Për Partinë Demokratike:
- PD ka bërë atë që asnjë parti politike, marksiste apo fashiste nuk e bën sot dhe nuk e ka bërë dje apo pardje në një vend demokratik: sulmon çdo ditë policinë e shtetit, jo thjesht ministrin, por policët.
- Një parti që i quan punonjësit e policisë “çunat e krimit” është fundi i vetëdijes morale qytetare e politike.
- Sulmet ndaj meje dhe ministrit të Brendshëm janë fjalë që jo na hyjnë nga një vesh e na dalin nga tjetri, por nuk na hyjnë as në njërin vesh, e jo më të na dalin nga tjetri.
- Lëreni policinë të bëjë detyrën dhe vazhdoni merruni sa të doni me mua, me ministrin.
- Nëse nuk keni asnjë ide sugjerim apo mendje në kokë për të ndihmuar që puna të bëhet më e mirë, minimalisht qepeni gojën sepse rezultatet e policisë së shtetit janë të dukshme.
