Tjetër sulmues i kombëtares shqiptare te Rangers

Pas Eros Grezdës, edhe Florian Kamberi do të provojë fanellën blu të Rangersit në Skoci. Shtatlarti 24-vjeçar, i cili ka zgjedhur të përfaqësojë edhe Shqipërinë, ka zyrtarizuar huazimin nga Hiberniani te skuadra e Steven Gerrard në Glasgow. “Për mua Ibrox (Stadiumi i Rangersit) ka atmosferën më të bukur të stadiumeve në të cilat kam luajtur ndonjëherë. Ndeshja ime e parë për Hibernians ka qenë kundër Rangersit në Ibrox dhe pas asaj ndeshjeje i pata thënë menaxherit tim se do e kisha ëndërr të luaja në atë stadium për ata tifozë.” – citohet të ketë thënë Kamberi. Sulmuesi u transferua në Skoci rreth 2 vite më parë. Për Hibernian ka luajtur rreth 65 ndeshje, duke shënuar 20 gola. Trajneri Steven Gerrard tha se e kishte ndjekur Kamberin nga afër dhe e vlerësonte për fizikun dhe aftësitë që ai shfaq në sulm.

“Jemi të lumtur që kemi përmbyllur këtë marrëveshje me Florianin [Kamberin] dhe e mirëpresim atë te Rangers. E kemi vëzhguar disa herë dhe e dime se çfarë mund t’i sjellë ai grupit. Ai është shumë punëtor dhe realizues. Besoj se mund të kontribuojë në synimet që kemi këtë sezon”

Pas rreth 9 vitesh, Rangers është në garë për titullin kampion. Diferenca me Celtic-un kryesues është rreth 6 pikë, por që blutë kanë dhe një ndeshje më pak. Afrimi i Kamberit vjen pasi Rangers huazoi edhe rumunin Ianis Hagi, djal i legjendës rumune Gheorghe. Kamberi bëhet shqiptari i dytë që vesh fanellën blu pas Grezdës. Ky i fundit u largua nga skuadra këtë janar pas problemeve që hasi me dëmtimet, trajnerin dhe ambientin.