Merkel fton Albin Kurtin në Gjermani

Kancelarja gjermane Angela Merkel ka ftuar kryeministrin e ri të Kosovës Albin Kurti për një vizitë zyrtare në Gjermani. Në një njoftim për median të qeverisë gjermane, kancelarja Merkel, duke shprehur mbështetjen e Gjermanisë, uroi Zotin Kurti për detyrën e re dhe e ftoi atë në Berlin:

"Gëzohem t'iu pres në Berlin dhe iu uroj fat e suksese në realizimin e detyrave para jush. Qeveria gjermane do të vazhdojë edhe më tej t'iu mbështesë në këtë rrugë."

Kancelarja thekson se qeveria e Kurtit ka përpara detyra të vështira si ngritjen dhe forcimin e shtetit ligjor në Kosovë, luftën ndaj korrupsionit e krimit të organizuar, përmirësimin e gjendjes ekonomike e veçanërisht rinisjen e dialogut me Serbinë. Gjermania është shteti që po kryeson përpjekjet europiane për rinisjen e dialogut Kosovë-Serbi.