Larja e duarve masa më e efektshme për parandalimin e prekjes nga koronavirusi

Në kohën kur lajmet për përhapjen e koronavirusit në Itali po shqetësojnë ndjeshëm qytetarët shqiptarë, infeksionisti i njohur Tritan Kalo ka rikujtuar se masa më e mirë parandaluese për prekjen nga viruset është rritja e higjienës personale. Përmes një postimi në Facebook, Kalo thotë se rritja e higjienës “është masë pak e kushtueshme” por “shumë e efektshme”. Higjiena personale nënkupton ruajtjen e pastërtisë së trupit, rrobave dhe shtëpisë.

“[…] Sensibilizimi në këtë drejtim prej gjithsecilit prej nesh, ndihmon më shumë se ironizimet sarkastike, në prononcimet në Facebook, para rezikut iminent.”

Kalo thekson se duhen kuptuar dhe u duhen dhënë hapësirë mesazheve që vijnë nga specialistët e epidemiologjisë dhe sëmundjeve infektive.

“[…] të bëhemi të gjithë pjesë e përballimit të këtij risku [koronavirusit], si kundër është mundësija e hyrjes së Covid-19 në Shqipëri. Infeksioni nga virusi është një formë tjetër e manifestimit të gripit, por me rrëzikshmëri më të madhe”

Mjeku i njohur i sëmundjeve infektive e shoqëroi postimin në Facebook me disa këshilla:

• Lani shpesh dhe mirë duart me ujë dhe sapun
• Shmangni prekjen e syve, hundës dhe gojës me duar të palara
• Shmangni përqafimet dhe puthjet në përshëndetjet e zakonshme
• Mbuloni hundën dhe gojën kur tështini apo kolliteni
• Shamitë pas përdorimit hidhini në vende të caktuara
• Ajrosni shpesh shtëpinë
• Nëse ju shfaqen shenja të gripit, qëndroni në shtëpi larg shkollës
• Nëse shenjat e gripit përkeqësohen kontaktoni mjekun

Për më shumë këshilla bazike nga Organizata Boterore e Shëndetësisë mund të klikoni këtu. Ndërkohë Ministria e Shëndetësisë dhe Mbrojtjes Sociale u rekomandon të gjithë qytetarëve që kanë udhëtuar së fundmi në vendet e prekura, të telefonojnë, pa u drejtuar menjëherë në spital, në numrin e Urgjencës Kombëtare 127 në rast të shfaqjes së çdo shqetësimi.